phul jo dil ki rahguzar mein hai

phuul jo dil kī rahguzar meñ hai

jaane kis ke vo intizār meñ hai

fikr bhī lutf-e-intizār meñ hai

be-qarārī bhī kuchh qarār meñ hai

zindagī tujh se kyā umiid rakhūñ

tū kahāñ mere iḳhtiyār meñ hai

apnā dushman hai ye jahāñ saarā

kitnī tāqat hamāre pyaar meñ hai

koī harakat nahīñ hai Daalī meñ

kyā parinde ke intizār meñ hai

kar sako to use karo mahsūs

ek lazzat jo nok-e-ḳhār meñ hai

vo jo aage thā jāñ-nisāroñ meñ

sab se pīchhe vahī qatār meñ hai

dhuul bhī mo'atabar hai raste kī

kārvāñ kā nishāñ ġhubār meñ hai

amn aur āshtī se us ko kyā

us kā maqsad to intishār meñ hai

dard to uñgliyoñ se miltā hai

varna āvāz to sitār meñ hai

kal bhī vo merā muntazir thā 'azīz'

aaj bhī mere intizār meñ hai

phul jo dil ki rahguzar mein hai

jaane kis ke wo intizar mein hai

fikr bhi lutf-e-intizar mein hai

be-qarari bhi kuchh qarar mein hai

zindagi tujh se kya umid rakhun

tu kahan mere iKHtiyar mein hai

apna dushman hai ye jahan sara

kitni taqat hamare pyar mein hai

koi harakat nahin hai Dali mein

kya parinde ke intizar mein hai

kar sako to use karo mahsus

ek lazzat jo nok-e-KHar mein hai

wo jo aage tha jaan-nisaron mein

sab se pichhe wahi qatar mein hai

dhul bhi mo'atabar hai raste ki

karwan ka nishan ghubar mein hai

amn aur aashti se us ko kya

us ka maqsad to intishaar mein hai

dard to ungliyon se milta hai

warna aawaz to sitar mein hai

kal bhi wo mera muntazir tha 'aziz'

aaj bhi mere intizar mein hai