pi pi ke jagmagae zamane guzar gae

pī pī ke jagmagā.e zamāne guzar ga.e

rātoñ ko din banā.e zamāne guzar ga.e

jān-e-bahār phuul nahīñ aadmī huuñ maiñ

aa jā ki muskurā.e zamāne guzar ga.e

kyā lā.iq-e-sitam bhī nahīñ ab maiñ dosto

patthar bhī ghar meñ aa.e zamāne guzar ga.e

o jaane vaale aa ki tire intizār meñ

raste ko ghar banā.e zamāne guzar ga.e

ġham hai na ab ḳhushī hai na ummīd hai na yaas

sab se najāt paa.e zamāne guzar ga.e

marne se vo Dareñ jo ba-qaid-e-hayāt haiñ

mujh ko to maut aa.e zamāne guzar ga.e

kyā kyā tavaqquāt thiiñ aahoñ se ai 'ḳhumār'

ye tiir bhī chalā.e zamāne guzar ga.e

pi pi ke jagmagae zamane guzar gae

raaton ko din banae zamane guzar gae

jaan-e-bahaar phul nahin aadmi hun main

aa ja ki muskurae zamane guzar gae

kya laiq-e-sitam bhi nahin ab main dosto

patthar bhi ghar mein aae zamane guzar gae

o jaane wale aa ki tere intizar mein

raste ko ghar banae zamane guzar gae

gham hai na ab KHushi hai na ummid hai na yas

sab se najat pae zamane guzar gae

marne se wo Daren jo ba-qaid-e-hayat hain

mujh ko to maut aae zamane guzar gae

kya kya tawaqquat thin aahon se ai 'KHumar'

ye tir bhi chalae zamane guzar gae