pyas sadiyon ki hai lamhon mein bujhana chahe

pyaas sadiyoñ kī hai lamhoñ meñ bujhānā chāhe

ik zamāna tirī āñkhoñ meñ samānā chāhe

aisī lahroñ meñ nadī paar kī hasrat kis ko

ab to jo aa.e yahāñ Duub hī jaanā chāhe

aaj bikne sar-e-bāzār maiñ ḳhud aayā huuñ

kyuuñ mujhe koī ḳharīdār banānā chāhe

mujh meñ aur tujh meñ hai ye farq to ab bhī qaa.im

tū mujhe chāhe magar tujh ko zamāna chāhe

kabhī iz.hār-e-mohabbat kabhī shikvoñ ke liye

tujh se milne kā koī roz bahānā chāhe

jis ko chhūne se mirā jism sulag uTThā thā

dil phir ik baar usī chhāñv meñ jaanā chāhe

us ke jazbāt se yuuñ khel rahā huuñ 'sāġhar'

jaise paanī meñ koī aag lagānā chāhe

pyas sadiyon ki hai lamhon mein bujhana chahe

ek zamana teri aankhon mein samana chahe

aisi lahron mein nadi par ki hasrat kis ko

ab to jo aae yahan Dub hi jaana chahe

aaj bikne sar-e-bazar main KHud aaya hun

kyun mujhe koi KHaridar banana chahe

mujh mein aur tujh mein hai ye farq to ab bhi qaim

tu mujhe chahe magar tujh ko zamana chahe

kabhi izhaar-e-mohabbat kabhi shikwon ke liye

tujh se milne ka koi roz bahana chahe

jis ko chhune se mera jism sulag uTTha tha

dil phir ek bar usi chhanw mein jaana chahe

us ke jazbaat se yun khel raha hun 'saghar'

jaise pani mein koi aag lagana chahe