pyase ke pas raat samundar paDa hua

pyāse ke paas raat samundar paḌā huā

karvaT badal rahā thā barābar paḌā huā

bāhar se dekhiye to badan haiñ hare-bhare

lekin lahū kā kaal hai andar paḌā huā

dīvār to hai raah meñ sālim khaḌī huī

saaya hai darmiyān se kaT kar paḌā huā

andar thī jitnī aag vo ThanDī na ho sakī

paanī thā sirf ghaas ke uupar paḌā huā

hāthoñ pe bah rahī hai lakīroñ kī aabjū

qismat kā khet phir bhī hai banjar paḌā huā

ye ḳhud bhī āsmān kī vus.at meñ qaid hai

kyā dekhtā hai chāñd ko chhat par paḌā huā

jaltā hai roz shaam ko ghāTī ke us taraf

din kā charāġh jhiil ke andar paḌā huā

maarā kisī ne sañg to Thokar lagī mujhe

dekhā to āsmāñ thā zamīñ par paḌā huā

pyase ke pas raat samundar paDa hua

karwaT badal raha tha barabar paDa hua

bahar se dekhiye to badan hain hare-bhare

lekin lahu ka kal hai andar paDa hua

diwar to hai rah mein salim khaDi hui

saya hai darmiyan se kaT kar paDa hua

andar thi jitni aag wo ThanDi na ho saki

pani tha sirf ghas ke upar paDa hua

hathon pe bah rahi hai lakiron ki aabju

qismat ka khet phir bhi hai banjar paDa hua

ye KHud bhi aasman ki wusat mein qaid hai

kya dekhta hai chand ko chhat par paDa hua

jalta hai roz sham ko ghaTi ke us taraf

din ka charagh jhil ke andar paDa hua

mara kisi ne sang to Thokar lagi mujhe

dekha to aasman tha zamin par paDa hua