qadam qadam pe kisi imtihan ki zad mein hai

qadam qadam pe kisī imtihāñ kī zad meñ hai

zamīn ab bhī kahīñ āsmāñ kī zad meñ hai

har ek gaam ulajhtā huuñ apne aap se maiñ

vo tiir huuñ jo ḳhud apnī kamāñ kī zad meñ hai

vo bahr huuñ jo ḳhud apne kināre chāTtā hai

vo lahar huuñ ki jo sail-e-ravāñ kī zad meñ hai

maiñ apnī zaat pe isrār kar rahā huuñ magar

yaqīñ kā khel musalsal gumāñ kī zad meñ hai

mire vajūd ke andar utartā jaatā hai

hai koī zahr jo merī zabāñ kī zad meñ hai

lagī huī hai nazar aane vaale manzar par

magar ye dil ki abhī raftagāñ kī zad meñ hai

yahī nahīñ ki faqat rizq-e-ḳhvāb band huā

gadā-e-kū-e-hunar bhī sagāñ kī zad meñ hai

ufuq ufuq jo mire nuur kā ġhubār uḌā

ye kā.enāt mire ḳhāk-dāñ kī zad meñ hai

qadam qadam pe kisi imtihan ki zad mein hai

zamin ab bhi kahin aasman ki zad mein hai

har ek gam ulajhta hun apne aap se main

wo tir hun jo KHud apni kaman ki zad mein hai

wo bahr hun jo KHud apne kinare chaTta hai

wo lahar hun ki jo sail-e-rawan ki zad mein hai

main apni zat pe israr kar raha hun magar

yaqin ka khel musalsal guman ki zad mein hai

mere wajud ke andar utarta jata hai

hai koi zahr jo meri zaban ki zad mein hai

lagi hui hai nazar aane wale manzar par

magar ye dil ki abhi raftagan ki zad mein hai

yahi nahin ki faqat rizq-e-KHwab band hua

gada-e-ku-e-hunar bhi sagan ki zad mein hai

ufuq ufuq jo mere nur ka ghubar uDa

ye kaenat mere KHak-dan ki zad mein hai