qaside le ke sare shaukat-e-darbar tak aae

qasīde le ke saare shaukat-e-darbār tak aa.e

hamīñ do chaar the jo halqa-e-inkār tak aa.e

vo taptī dhuup se jab sāya-e-dīvār tak aa.e

to jaatī dhuup ke manzar lab-e-iz.hār tak aa.e

vo jis ko dekhne ik bhiiḌ umDī thī sar-e-maqtal

usī kī diid ko ham bhī sutūn-e-dār tak aa.e

tarab-zādoñ kī rāteñ husn se ābād rahtī thiiñ

suḳhan-zāde to bas zikr-e-lab-o-ruḳhsār tak aa.e

zamīñ ke haath par hai āsmāñ ye kyā maqām aayā

ye kis imkāñ bharī duniyā ke ham āsār tak aa.e

anā ke gumbadoñ meñ jin kā fan gūñjā kiyā barsoñ

hunar un ke bhī bikne raunaq-e-bāzār tak aa.e

qaside le ke sare shaukat-e-darbar tak aae

hamin do chaar the jo halqa-e-inkar tak aae

wo tapti dhup se jab saya-e-diwar tak aae

to jati dhup ke manzar lab-e-izhaar tak aae

wo jis ko dekhne ek bhiD umDi thi sar-e-maqtal

usi ki did ko hum bhi sutun-e-dar tak aae

tarab-zadon ki raaten husn se aabaad rahti thin

suKHan-zade to bas zikr-e-lab-o-ruKHsar tak aae

zamin ke hath par hai aasman ye kya maqam aaya

ye kis imkan bhari duniya ke hum aasar tak aae

ana ke gumbadon mein jin ka fan gunja kiya barson

hunar un ke bhi bikne raunaq-e-bazar tak aae