raat kya kya mujhe malal na tha

raat kyā kyā mujhe malāl na thā

ḳhvāb kā to kahīñ ḳhayāl na thā

aaj kyā jaane kyā huā ham ko

kal bhī aisā to jī niDhāl na thā

bole sab dekh merī jāñ-kāvī

ye to farhād kā bhī haal na thā

jab talak ham na chāhte the tujhe

tab tak aisā tirā jamāl na thā

ab to dil lag gayā hai kyuuñ ki na aa.eñ

pahle kahte to kuchh muhāl na thā

Tal gayā dekh yuuñ tirā abrū

ki goyā charḳh par hilāl na thā

Tuk na Thahrā mire vo paas aa kar

kuchh tamāshā thā ye visāl na thā

dekh shab apne rashk-e-lailā ko

dañg thā maiñ to mujh meñ haal na thā

sun ke bolā tamām qissa-e-qais

ishq kā us ko bhī kamāl na thā

itnā royā lahū tū kab 'jur.at'

abhī dāman tirā to laal na thā

raat kya kya mujhe malal na tha

KHwab ka to kahin KHayal na tha

aaj kya jaane kya hua hum ko

kal bhi aisa to ji niDhaal na tha

bole sab dekh meri jaan-kawi

ye to farhad ka bhi haal na tha

jab talak hum na chahte the tujhe

tab tak aisa tera jamal na tha

ab to dil lag gaya hai kyun ki na aaen

pahle kahte to kuchh muhaal na tha

Tal gaya dekh yun tera abru

ki goya charKH par hilal na tha

Tuk na Thahra mere wo pas aa kar

kuchh tamasha tha ye visal na tha

dekh shab apne rashk-e-laila ko

dang tha main to mujh mein haal na tha

sun ke bola tamam qissa-e-qais

ishq ka us ko bhi kamal na tha

itna roya lahu tu kab 'jurat'

abhi daman tera to lal na tha