subh ko hashr bhi hai kaT gai gar aaj ki raat

sub.h ko hashr bhī hai kaT ga.ī gar aaj kī raat

de rahā hai mirā dil kal kī ḳhabar aaj kī raat

mere nāloñ meñ ġhazab kā hai asar aaj kī raat

log thāme hue baiThe haiñ jigar aaj kī raat

zabt maane hai ki vo shoḳh shikāyat na kare

be-sadā aah bhī hai misl-e-asar aaj kī raat

TuuTe paḌte haiñ falak se bhī sitāre paiham

chunñe baiThā hai jo afshāñ vo qamar aaj kī raat

zabt-e-nāla ne ye andher kiyā siine meñ

ban gayā ghuT ke dhuāñ soz-e-jigar aaj kī raat

subh ko hashr bhi hai kaT gai gar aaj ki raat

de raha hai mera dil kal ki KHabar aaj ki raat

mere nalon mein ghazab ka hai asar aaj ki raat

log thame hue baiThe hain jigar aaj ki raat

zabt mane hai ki wo shoKH shikayat na kare

be-sada aah bhi hai misl-e-asar aaj ki raat

TuTe paDte hain falak se bhi sitare paiham

chunne baiTha hai jo afshan wo qamar aaj ki raat

zabt-e-nala ne ye andher kiya sine mein

ban gaya ghuT ke dhuan soz-e-jigar aaj ki raat