raaz-e-nihan zaban-e-aghyar tak na pahuncha

rāz-e-nihāñ zabān-e-aġhyār tak na pahuñchā

kyā ek bhī hamārā ḳhat yaar tak na pahuñchā

allāh re nā-tavānī jab shiddat-e-qalaq meñ

bālīñ se sar uThāyā dīvār tak na pahuñchā

rote to rahm aatā so us ke rū-ba-rū to

ik qatra ḳhuuñ bhī chashm-e-ḳhūñ-bār tak na pahuñchā

āshiq se mat bayāñ kar qatl-e-adū kā muzhda

paiġhām-e-marg hai ye bīmār tak na pahuñchā

be-baḳht rañg-e-ḳhūbī kis kaam kā ki maiñ to

thā gulvale kisī kī dastār tak na pahuñchā

muft avval-e-suḳhan meñ āshiq ne jaan de dī

qāsid bayān terā iqrār tak na pahuñchā

thī ḳhaar raah terī mizhgāñ kī yaad phir shab

tā-sub.h ḳhvāb chashm-e-bedār tak na pahuñchā

baḳht-e-rasā adū ke jo chāhe so kahe ab

yak baar yaar mujh tak maiñ yaar tak na pahuñchā

ġhairoñ se us ne hargiz chhoḌī na hāthā-pā.ī

jab tak ajal kā sadma do-chār tak na pahuñchā

'momin' usī ne mujh se dī bartarī kisī ko

jo past-fahm mere ash.ār tak na pahuñchā

raaz-e-nihan zaban-e-aghyar tak na pahuncha

kya ek bhi hamara KHat yar tak na pahuncha

allah re na-tawani jab shiddat-e-qalaq mein

baalin se sar uThaya diwar tak na pahuncha

rote to rahm aata so us ke ru-ba-ru to

ek qatra KHun bhi chashm-e-KHun-bar tak na pahuncha

aashiq se mat bayan kar qatl-e-adu ka muzhda

paigham-e-marg hai ye bimar tak na pahuncha

be-baKHt rang-e-KHubi kis kaam ka ki main to

tha gulwale kisi ki dastar tak na pahuncha

muft awwal-e-suKHan mein aashiq ne jaan de di

qasid bayan tera iqrar tak na pahuncha

thi KHar rah teri mizhgan ki yaad phir shab

ta-subh KHwab chashm-e-bedar tak na pahuncha

baKHt-e-rasa adu ke jo chahe so kahe ab

yak bar yar mujh tak main yar tak na pahuncha

ghairon se us ne hargiz chhoDi na hatha-pai

jab tak ajal ka sadma do-chaar tak na pahuncha

'momin' usi ne mujh se di bartari kisi ko

jo past-fahm mere ashaar tak na pahuncha