is shahr ke yahin kahin hone ka rang hai

is shahr ke yahīñ kahīñ hone kā rañg hai

is ḳhaak meñ kahīñ kahīñ sone kā rañg hai

pā.īñ chaman hai ḳhud-rav daraḳhtoñ kā jhunD sā

mehrāb-e-dar pe us ke na hone kā rañg hai

tūfān-e-abr-o-bād nihāñ sāhiloñ pe hai

dariyā kī ḳhāmushī meñ Dubone kā rañg hai

is ahd se vafā kā sila marg-e-rā.egāñ

us kī fazā meñ har ghaḌī khone kā rañg hai

hai sar-zamīn-e-shor ki ik chādar-e-safā

kaisā ajiib murda bichhaune kā rañg hai

surḳhī hai jo gulāb sī āñkhoñ meñ ai 'munīr'

ḳhār-e-bahār dil meñ chubhone kā rañg hai

is shahr ke yahin kahin hone ka rang hai

is KHak mein kahin kahin sone ka rang hai

pain chaman hai KHud-raw daraKHton ka jhunD sa

mehrab-e-dar pe us ke na hone ka rang hai

tufan-e-abr-o-baad nihan sahilon pe hai

dariya ki KHamushi mein Dubone ka rang hai

is ahd se wafa ka sila marg-e-raegan

us ki faza mein har ghaDi khone ka rang hai

hai sar-zamin-e-shor ki ek chadar-e-safa

kaisa ajib murda bichhaune ka rang hai

surKHi hai jo gulab si aankhon mein ai 'munir'

KHar-e-bahaar dil mein chubhone ka rang hai