raushan tamam kaba o but-KHana ho gaya

raushan tamām kaaba o but-ḳhāna ho gayā

ghar-ghar jamāl-e-yār kā afsāna ho gayā

sūrat-parast kab hue ma.anī se āshnā

aalam fareb-e-tūr kā afsāna ho gayā

chashm-e-havas hai shefta-e-husn-e-zāhirī

dil āshnā-e-ma.ani-e-begāna ho gayā

āsāñ nahīñ hai aag meñ dānista kūdnā

dīvāna shauq-e-vasl meñ parvāna ho gayā

kaifiyat-e-hayāt thī dam bhar kī mehmāñ

labrez piite hī mirā paimāna ho gayā

ashkoñ se jaam bhar ga.e saaqī kī yaad meñ

kuchh to ma.āl-e-majlis-e-rindāna ho gayā

dair o haram bhī Dhah ga.e jab dil nahīñ rahā

sab dekhte hī dekhte vīrāna ho gayā

kal kī hai baat josh pe thā ālam-e-shabāb

yādash-ba-ḳhair aaj ik afsāna ho gayā

ā.īna dekhtā hai garebāñ ko phaaḌ kar

vahshī ab apnā aap hī dīvāna ho gayā

kyā jaane aaj ḳhvāb meñ kyā dekhā 'yās' ne

kyuuñ chauñkte hī aap se begāna ho gayā

raushan tamam kaba o but-KHana ho gaya

ghar-ghar jamal-e-yar ka afsana ho gaya

surat-parast kab hue mani se aashna

aalam fareb-e-tur ka afsana ho gaya

chashm-e-hawas hai shefta-e-husn-e-zahiri

dil aashna-e-mani-e-begana ho gaya

aasan nahin hai aag mein danista kudna

diwana shauq-e-wasl mein parwana ho gaya

kaifiyat-e-hayat thi dam bhar ki mehman

labrez pite hi mera paimana ho gaya

ashkon se jam bhar gae saqi ki yaad mein

kuchh to maal-e-majlis-e-rindana ho gaya

dair o haram bhi Dhah gae jab dil nahin raha

sab dekhte hi dekhte virana ho gaya

kal ki hai baat josh pe tha aalam-e-shabab

yaadash-ba-KHair aaj ek afsana ho gaya

aaina dekhta hai gareban ko phaD kar

wahshi ab apna aap hi diwana ho gaya

kya jaane aaj KHwab mein kya dekha 'yas' ne

kyun chaunkte hi aap se begana ho gaya