aankhon mein raha dil mein utar kar nahin dekha

āñkhoñ meñ rahā dil meñ utar kar nahīñ dekhā

kashtī ke musāfir ne samundar nahīñ dekhā

be-vaqt agar jā.ūñgā sab chauñk paḌeñge

ik umr huī din meñ kabhī ghar nahīñ dekhā

jis din se chalā huuñ mirī manzil pe nazar hai

āñkhoñ ne kabhī miil kā patthar nahīñ dekhā

ye phuul mujhe koī virāsat meñ mile haiñ

tum ne mirā kāñToñ bharā bistar nahīñ dekhā

yāroñ kī mohabbat kā yaqīñ kar liyā maiñ ne

phūloñ meñ chhupāyā huā ḳhanjar nahīñ dekhā

mahbūb kā ghar ho ki buzurgoñ kī zamīneñ

jo chhoḌ diyā phir use muḌ kar nahīñ dekhā

ḳhat aisā likhā hai ki nagīne se jaḌe haiñ

vo haath ki jis ne koī zevar nahīñ dekhā

patthar mujhe kahtā hai mirā chāhne vaalā

maiñ mom huuñ us ne mujhe chhū kar nahīñ dekhā

aankhon mein raha dil mein utar kar nahin dekha

kashti ke musafir ne samundar nahin dekha

be-waqt agar jaunga sab chaunk paDenge

ek umr hui din mein kabhi ghar nahin dekha

jis din se chala hun meri manzil pe nazar hai

aankhon ne kabhi mil ka patthar nahin dekha

ye phul mujhe koi wirasat mein mile hain

tum ne mera kanTon bhara bistar nahin dekha

yaron ki mohabbat ka yaqin kar liya main ne

phulon mein chhupaya hua KHanjar nahin dekha

mahbub ka ghar ho ki buzurgon ki zaminen

jo chhoD diya phir use muD kar nahin dekha

KHat aisa likha hai ki nagine se jaDe hain

wo hath ki jis ne koi zewar nahin dekha

patthar mujhe kahta hai mera chahne wala

main mom hun us ne mujhe chhu kar nahin dekha