ruki ruki si shab-e-marg KHatm par aai

rukī rukī sī shab-e-marg ḳhatm par aa.ī

vo pau phaTī vo na.ī zindagī nazar aa.ī

ye moḌ vo hai ki parchhā.iyāñ bhī deñgī na saath

musāfiroñ se kaho us kī rahguzar aa.ī

fazā tabassum-e-sub.h-e-bahār thī lekin

pahuñch ke manzil-e-jānāñ pe aañkh bhar aa.ī

kahīñ zamān-o-makāñ meñ hai naam ko bhī sukūñ

magar ye baat mohabbat kī baat par aa.ī

kisī kī bazm-e-tarab meñ hayāt baTtī thī

umīd-vāroñ meñ kal maut bhī nazar aa.ī

kahāñ har ek se insāniyat kā baar uThā

ki ye balā bhī tire āshiqoñ ke sar aa.ī

diloñ meñ aaj tirī yaad muddatoñ ke ba.ad

ba-chehra-e-mutabassim ba-chashm-e-tar aa.ī

nayā nahīñ hai mujhe marg-e-nā-gahāñ kā payām

hazār rañg se apnī mujhe ḳhabar aa.ī

fazā ko jaise koī raag chīrtā jaa.e

tirī nigāh diloñ meñ yūñhī utar aa.ī

zarā visāl ke ba.ad aa.ina to dekh ai dost

tire jamāl kī doshīzgī nikhar aa.ī

tirā hī aks sarishk-e-ġham-e-zamāna meñ thā

nigāh meñ tirī tasvīr sī utar aa.ī

ajab nahīñ ki chaman-dar-chaman bane har phuul

kalī kalī kī sabā jā ke god bhar aa.ī

shab-e-'firāq' uThe dil meñ aur bhī kuchh dard

kahūñ ye kaise tirī yaad rāt-bhar aa.ī

ruki ruki si shab-e-marg KHatm par aai

wo pau phaTi wo nai zindagi nazar aai

ye moD wo hai ki parchhaiyan bhi dengi na sath

musafiron se kaho us ki rahguzar aai

faza tabassum-e-subh-e-bahaar thi lekin

pahunch ke manzil-e-jaanan pe aankh bhar aai

kahin zaman-o-makan mein hai nam ko bhi sukun

magar ye baat mohabbat ki baat par aai

kisi ki bazm-e-tarab mein hayat baTti thi

umid-waron mein kal maut bhi nazar aai

kahan har ek se insaniyat ka bar uTha

ki ye bala bhi tere aashiqon ke sar aai

dilon mein aaj teri yaad muddaton ke baad

ba-chehra-e-mutabassim ba-chashm-e-tar aai

naya nahin hai mujhe marg-e-na-gahan ka payam

hazar rang se apni mujhe KHabar aai

faza ko jaise koi rag chirta jae

teri nigah dilon mein yunhi utar aai

zara visal ke baad aaina to dekh ai dost

tere jamal ki doshizgi nikhar aai

tera hi aks sarishk-e-gham-e-zamana mein tha

nigah mein teri taswir si utar aai

ajab nahin ki chaman-dar-chaman bane har phul

kali kali ki saba ja ke god bhar aai

shab-e-'firaq' uThe dil mein aur bhi kuchh dard

kahun ye kaise teri yaad raat-bhar aai