saqi tere baghair hai mahfil se dil uchaT

saaqī tire baġhair hai mahfil se dil uchāT

so jaise jī udaas hai so dil se dil uchāT

sū-e-adam phire chale jaate haiñ qāfile

sab ham-safar haiñ ziist hai manzil se dil uchāT

jis roz se ki shauq-e-asīrī huā mujhe

sayyād hai shikār-e-anādil se dil uchāT

Thukrā.e bhī na aa ke lahad fātiha kujā

mar kar huā huuñ us but-e-qātil se dil uchāT

juz marg kuchh nahīñ hai tap-e-hijr kā ilaaj

ham naqsh chaaT kar hue aamil se dil uchāT

kāñToñ pe misl-e-qais kahāñ tak ravāñ-davāñ

lailā-e-jāñ hai jism kī mahmil se dil uchāT

dozaḳh mujhe bahisht ke badle qubūl hai

aisā huuñ ek hūr-shamā.il se dil uchāT

jhankār se maiñ chār-qadam aage jā.ūñgā

zindān meñ huā jo salāsil se dil uchāT

majnūñ kī chaal lailā agar do-qadam chale

tābūt dil-pasand ho mahmil se dil uchāT

qātil hamāre dil ko taḌaptā na chhoḌ jā

ik dam ke vāste na ho bismil se dil uchāT

ai 'bahr' yaar saath nahīñ jā.iye kahāñ

gulshan se jī udaas hai mahfil se dil uchāT

saqi tere baghair hai mahfil se dil uchaT

so jaise ji udas hai so dil se dil uchaT

su-e-adam phire chale jate hain qafile

sab ham-safar hain zist hai manzil se dil uchaT

jis roz se ki shauq-e-asiri hua mujhe

sayyaad hai shikar-e-anadil se dil uchaT

Thukrae bhi na aa ke lahad fatiha kuja

mar kar hua hun us but-e-qatil se dil uchaT

juz marg kuchh nahin hai tap-e-hijr ka ilaj

hum naqsh chaT kar hue aamil se dil uchaT

kanTon pe misl-e-qais kahan tak rawan-dawan

laila-e-jaan hai jism ki mahmil se dil uchaT

dozaKH mujhe bahisht ke badle qubul hai

aisa hun ek hur-shamail se dil uchaT

jhankar se main chaar-qadam aage jaunga

zindan mein hua jo salasil se dil uchaT

majnun ki chaal laila agar do-qadam chale

tabut dil-pasand ho mahmil se dil uchaT

qatil hamare dil ko taDapta na chhoD ja

ek dam ke waste na ho bismil se dil uchaT

ai 'bahr' yar sath nahin jaiye kahan

gulshan se ji udas hai mahfil se dil uchaT