saya agar nasib ho diwar-e-yar ka

saaya agar nasīb ho dīvār-e-yār kā

kyā martaba buland ho apne mazār kā

vo dasht-e-haulnāk vo hubb-e-vatan kā josh

phir phir ke dekhnā vo kisī be-dayār kā

lau de rahī hai shaam se aaj āh-e-ātishīñ

shola bhaḌak rahā hai dil-e-dāġhdār kā

tasvīr-e-naza.a dekhnā chāho to dekh lo

rah rah ke jhilmilānā charāġh-e-mazār kā

par taulne lage phir asīrān-e-bad-nasīb

shāyad qarīb aa gayā mausam bahār kā

mū-e-safed kāñpte haath aur jām-e-mai

dikhlā rahe haiñ rañg ḳhizāñ meñ bahār kā

añgḌā.iyoñ ke saath kahīñ dam nikal na jaa.e

āsāñ nahīñ hai ranj uThānā ḳhumār kā

saaqī girā na dījiyo ye jām-e-āḳhirī

dil TuuT jā.egā kisī ummīd-vār kā

mastoñ kī rūheñ bhaTkeñgī achchhā nahīñ hai ab

ghir-ghir ke aanā qabroñ par abr-e-bahār kā

dekho to apne vahshiyoñ kī jāma-zebīyāñ

allāh re husn pairahan-e-tār-tār kā

jurm-e-guzishta afv kun o mājrā mapurs

maarā huā huuñ is dil-e-be-iḳhtiyār kā

duniyā se 'yās' jaane ko jī chāhtā nahīñ

allāh re husn gulshan-e-nā-pā.edār kā

saya agar nasib ho diwar-e-yar ka

kya martaba buland ho apne mazar ka

wo dasht-e-haulnak wo hubb-e-watan ka josh

phir phir ke dekhna wo kisi be-dayar ka

lau de rahi hai sham se aaj aah-e-atishin

shola bhaDak raha hai dil-e-daghdar ka

taswir-e-naza dekhna chaho to dekh lo

rah rah ke jhilmilana charagh-e-mazar ka

par taulne lage phir asiran-e-bad-nasib

shayad qarib aa gaya mausam bahaar ka

mu-e-safed kanpte hath aur jam-e-mai

dikhla rahe hain rang KHizan mein bahaar ka

angDaiyon ke sath kahin dam nikal na jae

aasan nahin hai ranj uThana KHumar ka

saqi gira na dijiyo ye jam-e-aKHiri

dil TuT jaega kisi ummid-war ka

maston ki ruhen bhaTkengi achchha nahin hai ab

ghir-ghir ke aana qabron par abr-e-bahaar ka

dekho to apne wahshiyon ki jama-zebiyan

allah re husn pairahan-e-tar-tar ka

jurm-e-guzishta afw kun o majra mapurs

mara hua hun is dil-e-be-iKHtiyar ka

duniya se 'yas' jaane ko ji chahta nahin

allah re husn gulshan-e-na-paedar ka