sabhi khaDe the sharik-e-zamana hote hue

sabhī khaḌe the sharīk-e-zamāna hote hue

kisī ne rokā na ghar se ravāna hote hue

charāġh bujhte chale jā rahe haiñ silsila-vār

maiñ ḳhud ko dekh rahā huuñ fasāna hote hue

achānak ek sitāra falak se Tuut gayā

mire bhī shāmil-e-bazm-e-shabāna hote hue

mirā hamesha un alfāz par yaqīn rahā

jo munkashif hue lab se adā na hote hue

isī tarah ke haiñ jitne bhī dukh hamāre haiñ

saroñ pe chhāñv nahīñ shāmiyāna hote hue

mirā bhī naam hai fehrist-e-mujrimāñ meñ likhā

maiñ dekhtā rahā ḳhālī ḳhazāna hote hue

parind lauT ke aane hī par nahīñ raazī

koī to baat hai jo āshiyāna hote hue

'ajab vo log the āzār bhī 'ajab un ke

zamīn chhoḌ ga.e āb-o-dāna hote hue

yahāñ to ḳhastagī-e-bām-o-dar pe chup haiñ sabhī

koī taḌaptā hai bairūn-e-ḳhāna hote hue

mirā kamāl ki maiñ is fazā meñ zinda huuñ

du'ā na milte hue aur havā na hote hue

harīf thā mire dushman kā vo magar maiñ ne

'jamāl' kī nahīñ bai'at bahāna hote hue

sabhi khaDe the sharik-e-zamana hote hue

kisi ne roka na ghar se rawana hote hue

charagh bujhte chale ja rahe hain silsila-war

main KHud ko dekh raha hun fasana hote hue

achanak ek sitara falak se Tut gaya

mere bhi shamil-e-bazm-e-shabana hote hue

mera hamesha un alfaz par yaqin raha

jo munkashif hue lab se ada na hote hue

isi tarah ke hain jitne bhi dukh hamare hain

saron pe chhanw nahin shamiyana hote hue

mera bhi nam hai fehrist-e-mujriman mein likha

main dekhta raha KHali KHazana hote hue

parind lauT ke aane hi par nahin raazi

koi to baat hai jo aashiyana hote hue

'ajab wo log the aazar bhi 'ajab un ke

zamin chhoD gae aab-o-dana hote hue

yahan to KHastagi-e-baam-o-dar pe chup hain sabhi

koi taDapta hai bairun-e-KHana hote hue

mera kamal ki main is faza mein zinda hun

du'a na milte hue aur hawa na hote hue

harif tha mere dushman ka wo magar main ne

'jamal' ki nahin bai'at bahana hote hue