kuchh ishq tha kuchh majburi thi so maine jiwan war diya

kuchh ishq thā kuchh majbūrī thī so maiñ ne jīvan vaar diyā

maiñ kaisā zinda aadmī thā ik shaḳhs ne mujh ko maar diyā

ik sabz shāḳh gulāb kī thā ik duniyā apne ḳhvāb kī thā

vo ek bahār jo aa.ī nahīñ us ke liye sab kuchh haar diyā

ye sajā-sajāyā ghar sāthī mirī zaat nahīñ mirā haal nahīñ

ai kaash kabhī tum jaan sako jo is sukh ne āzār diyā

maiñ khulī huī ik sachchā.ī mujhe jānñe vaale jānte haiñ

maiñ ne kin logoñ se nafrat kī aur kin logoñ ko pyaar diyā

vo ishq bahut mushkil thā magar āsān na thā yuuñ jiinā bhī

us ishq ne zinda rahne kā mujhe zarf diyā pindār diyā

maiñ rotā huuñ aur āsmān se taare TūTte dekhtā huuñ

un logoñ par jin logoñ ne mire logoñ ko āzār diyā

vo yaar hoñ yā mahbūb mire yā kabhī kabhī milne vaale

ik lazzat sab ke milne meñ vo zaḳhm diyā yā pyaar diyā

mire bachchoñ ko allāh rakhe in taaza havā ke jhoñkoñ ne

maiñ ḳhushk peḌ ḳhizāñ kā thā mujhe kaisā barg-o-bār diyā

kuchh ishq tha kuchh majburi thi so main ne jiwan war diya

main kaisa zinda aadmi tha ek shaKHs ne mujh ko mar diya

ek sabz shaKH gulab ki tha ek duniya apne KHwab ki tha

wo ek bahaar jo aai nahin us ke liye sab kuchh haar diya

ye saja-sajaya ghar sathi meri zat nahin mera haal nahin

ai kash kabhi tum jaan sako jo is sukh ne aazar diya

main khuli hui ek sachchai mujhe jaanne wale jaante hain

main ne kin logon se nafrat ki aur kin logon ko pyar diya

wo ishq bahut mushkil tha magar aasan na tha yun jina bhi

us ishq ne zinda rahne ka mujhe zarf diya pindar diya

main rota hun aur aasman se tare TuTte dekhta hun

un logon par jin logon ne mere logon ko aazar diya

wo yar hon ya mahbub mere ya kabhi kabhi milne wale

ek lazzat sab ke milne mein wo zaKHm diya ya pyar diya

mere bachchon ko allah rakhe in taza hawa ke jhonkon ne

main KHushk peD KHizan ka tha mujhe kaisa barg-o-bar diya