safina le gae maujon ki garm-joshi mein

safīna le ga.e maujoñ kī garm-joshī meñ

hazīmat aa.ī nazar jab kinārā-koshī meñ

nasha chaḌhā to zabāñ par na iḳhtiyār rahā

vo munkashif hue ḳhud apnī bāda-noshī meñ

banā liyā use saanī phir apnī fitrat kā

sukūñ jo milne lagā un ko zahr-noshī meñ

qubūl rabb-e-karīm-o-rahīm ne kar lī

mirī zabāñ pe jo aa.ī duā ḳhamoshī meñ

khulī zabān to zarf un kā ho gayā zāhir

hazār bhed chhupā rakkhe the ḳhamoshī meñ

pasand kī na zamāne ne sādgī merī

bharam rakkhā hai ḳhudā ne safed-poshī meñ

zad-e-itāb meñ un ke jo aa ga.e 'anvar'

na jaane kah ga.e kyā kyā vo garm-joshī meñ

safina le gae maujon ki garm-joshi mein

hazimat aai nazar jab kinara-koshi mein

nasha chaDha to zaban par na iKHtiyar raha

wo munkashif hue KHud apni baada-noshi mein

bana liya use sani phir apni fitrat ka

sukun jo milne laga un ko zahr-noshi mein

qubul rabb-e-karim-o-rahim ne kar li

meri zaban pe jo aai dua KHamoshi mein

khuli zaban to zarf un ka ho gaya zahir

hazar bhed chhupa rakkhe the KHamoshi mein

pasand ki na zamane ne sadgi meri

bharam rakkha hai KHuda ne safed-poshi mein

zad-e-itab mein un ke jo aa gae 'anwar'

na jaane kah gae kya kya wo garm-joshi mein