sahra pe bura waqt mere yar paDa hai

sahrā pe burā vaqt mire yaar paḌā hai

dīvāna ka.ī roz se bīmār paḌā hai

sab raunaq-e-sahrā thī isī pagle ke dam se

ujḌā huā dīvāne kā darbār paḌā hai

āñkhoñ se Tapaktī hai vahī vahshat-e-sahrā

kāñdhe bhī batāte haiñ baḌā baar paḌā hai

dil meñ jo lahū-jhīl thī vo suukh chukī hai

āñkhoñ kā do-ābā hai so be-kār paḌā hai

tum kahte the din ho ga.e dekhā nahīñ us ko

lo dekh lo ye aaj kā aḳhbār paḌā hai

oḌhe hue ummīd kī ik mailī sī chādar

darvāza-e-baḳhshish pe gunahgār paḌā hai

ai ḳhāk-e-vatan tujh se maiñ sharminda bahut huuñ

mahñgā.ī ke mausam meñ ye tyauhār paḌā hai

sahra pe bura waqt mere yar paDa hai

diwana kai roz se bimar paDa hai

sab raunaq-e-sahra thi isi pagle ke dam se

ujDa hua diwane ka darbar paDa hai

aankhon se Tapakti hai wahi wahshat-e-sahra

kandhe bhi batate hain baDa bar paDa hai

dil mein jo lahu-jhil thi wo sukh chuki hai

aankhon ka do-aba hai so be-kar paDa hai

tum kahte the din ho gae dekha nahin us ko

lo dekh lo ye aaj ka aKHbar paDa hai

oDhe hue ummid ki ek maili si chadar

darwaza-e-baKHshish pe gunahgar paDa hai

ai KHak-e-watan tujh se main sharminda bahut hun

mahngai ke mausam mein ye tyauhaar paDa hai