sair karne se hawa lene se

sair karne se havā lene se

kaam hai dil ko maza lene se

dhuup saa.e kī tarah phail ga.ī

in daraḳhtoñ kī duā lene se

is tarah haal koī chhuptā hai

is tarah zaḳhm chhupā lene se

koī maqbūl duā hotī hai

sirf hāthoñ ko uThā lene se

mere jaisā vo nahīñ ho saktā

merā andāz churā lene se

raat kuchh achchhī guzar jaatī hai

chāñd ko chhat pe bulā lene se

vaqt be-vaqt kā āzār milā

vaqt ko saath lagā lene se

aaj bhī naam vahī hai apnā

kyā huā naam kamā lene se

sair karne se hawa lene se

kaam hai dil ko maza lene se

dhup sae ki tarah phail gai

in daraKHton ki dua lene se

is tarah haal koi chhupta hai

is tarah zaKHm chhupa lene se

koi maqbul dua hoti hai

sirf hathon ko uTha lene se

mere jaisa wo nahin ho sakta

mera andaz chura lene se

raat kuchh achchhi guzar jati hai

chand ko chhat pe bula lene se

waqt be-waqt ka aazar mila

waqt ko sath laga lene se

aaj bhi nam wahi hai apna

kya hua nam kama lene se