salamat rahen dil mein ghar karne wale

salāmat raheñ dil meñ ghar karne vaale

is ujḌe makāñ meñ basar karne vaale

gale par chhurī kyuuñ nahīñ pher dete

asīroñ ko be-bāl-o-par karne vaale

añdhere ujāle kahīñ to mileñge

vatan se hameñ dar-ba-dar karne vaale

garebāñ meñ muñh Daal kar ḳhud to dekheñ

burā.ī pe merī nazar karne vaale

is ā.īna-ḳhāne meñ kyā sar uThāte

haqīqat par apnī nazar karne vaale

bahār-e-do-roza se dil kyā bahaltā

ḳhabar kar chuke the ḳhabar karne vaale

khaḌe haiñ do-rāhe pe dair o haram ke

tirī justujū meñ safar karne vaale

sar-e-shām gul ho ga.ī sham-e-bālīñ

salāmat haiñ ab tak sahar karne vaale

kujā sehn-e-ālam kujā kunj-e-marqad

basar kar rahe haiñ basar karne vaale

'yagānā' vahī fāteh-e-lakhknau haiñ

dil-e-sañg-o-āhan meñ ghar karne vaale

salamat rahen dil mein ghar karne wale

is ujDe makan mein basar karne wale

gale par chhuri kyun nahin pher dete

asiron ko be-baal-o-par karne wale

andhere ujale kahin to milenge

watan se hamein dar-ba-dar karne wale

gareban mein munh Dal kar KHud to dekhen

burai pe meri nazar karne wale

is aaina-KHane mein kya sar uThate

haqiqat par apni nazar karne wale

bahaar-e-do-roza se dil kya bahalta

KHabar kar chuke the KHabar karne wale

khaDe hain do-rahe pe dair o haram ke

teri justuju mein safar karne wale

sar-e-sham gul ho gai sham-e-baalin

salamat hain ab tak sahar karne wale

kuja sehn-e-alam kuja kunj-e-marqad

basar kar rahe hain basar karne wale

'yagana' wahi fateh-e-lakhknau hain

dil-e-sang-o-ahan mein ghar karne wale