sang-e-tiflan ka hadaf jism hamara nikla

sañg-e-tiflāñ kā hadaf jism hamārā niklā

ham to jis shahr ga.e shahr tumhārā niklā

kis se ummīd kareñ koī ilāj-e-dil kī

chārāgar bhī to bahut dard kā maarā niklā

jaane muddat pe tirī yaad kidhar se aa.ī

raakh ke Dher meñ poshīda sharārā niklā

dil pe kyā jaane guzar jaatī hai kyā pichhle-pahar

os Tapkī to kahīñ sub.h kā taara niklā

jaate jaate diyā is tarah dilāsā us ne

biich dariyā meñ koī jaise kināra niklā

koī sahrā kā havāla na samundar kī misāl

jo bhī Duubā hai jahāñ dost hamārā niklā

bul-havas zid meñ sahī dār-o-rasan se guzrā

ab pashemāñ hai ki saudā ye ḳhasāra niklā

sang-e-tiflan ka hadaf jism hamara nikla

hum to jis shahr gae shahr tumhaara nikla

kis se ummid karen koi ilaj-e-dil ki

chaaragar bhi to bahut dard ka mara nikla

jaane muddat pe teri yaad kidhar se aai

rakh ke Dher mein poshida sharara nikla

dil pe kya jaane guzar jati hai kya pichhle-pahar

os Tapki to kahin subh ka tara nikla

jate jate diya is tarah dilasa us ne

bich dariya mein koi jaise kinara nikla

koi sahra ka hawala na samundar ki misal

jo bhi Duba hai jahan dost hamara nikla

bul-hawas zid mein sahi dar-o-rasan se guzra

ab pasheman hai ki sauda ye KHasara nikla