sar jis pe na jhuk jae use dar nahin kahte

sar jis pe na jhuk jaa.e use dar nahīñ kahte

har dar pe jo jhuk jaa.e use sar nahīñ kahte

ka.abe meñ musalmān ko kah dete haiñ kāfir

but-ḳhāne meñ kāfir ko bhī kāfir nahīñ kahte

rindoñ ko Darā sakte haiñ kyā hazrat-e-vā.iz

jo kahte haiñ allāh se Dar kar nahīñ kahte

ka.abe hī meñ har sajde ko kahte haiñ ibādat

mai-ḳhāne meñ har jaam ko sāġhar nahiñ kahte

har baar na.e shauq se hai arz-e-tamannā

sau baar bhī ham kah ke mukarrar nahīñ kahte

mai-ḳhāne ke andar bhī vo kahte nahīñ mai-ḳhvār

jo baat ki mai-ḳhāne ke bāhar nahīñ kahte

kyā ahl-e-jahāñ tujh ko sitamgar nahīñ kahte

kahte to haiñ lekin tire muñh par nahīñ kahte

kahte haiñ mohabbat faqat us haal ko 'bismil'

jis haal ko ham un se bhī aksar nahīñ kahte

sar jis pe na jhuk jae use dar nahin kahte

har dar pe jo jhuk jae use sar nahin kahte

kabe mein musalman ko kah dete hain kafir

but-KHane mein kafir ko bhi kafir nahin kahte

rindon ko Dara sakte hain kya hazrat-e-waiz

jo kahte hain allah se Dar kar nahin kahte

kabe hi mein har sajde ko kahte hain ibaadat

mai-KHane mein har jam ko saghar nahin kahte

har bar nae shauq se hai arz-e-tamanna

sau bar bhi hum kah ke mukarrar nahin kahte

mai-KHane ke andar bhi wo kahte nahin mai-KHwar

jo baat ki mai-KHane ke bahar nahin kahte

kya ahl-e-jahan tujh ko sitamgar nahin kahte

kahte to hain lekin tere munh par nahin kahte

kahte hain mohabbat faqat us haal ko 'bismil'

jis haal ko hum un se bhi aksar nahin kahte