raunaq-e-besh-o-kam kis ke hone se hai

raunaq-e-besh-o-kam kis ke hone se hai

mausam-e-ḳhushk-o-nam kis ke hone se hai

kis kā chehrā banātī haiñ ye sā.ateñ

vaqt kā zer-o-bam kis ke hone se hai

kaun guzrā ki bante ga.e rāste

raah kā pech-o-ḳham kis ke hone se hai

kis kī ḳhātir darīchoñ se aa.ī havā

ye fazā yuuñ baham kis ke hone se hai

shāḳh-dar-shāḳh pattoñ kī ye zindagī

aaj bhī mohtaram kis ke hone se hai

maut bar-haq hai kis ke na hone se aaj

zindagī dam-ba-dam kis ke hone se hai

kis kī zulfoñ kā e.ajāz hai bū-e-gul

ye havāoñ meñ nam kis ke hone se hai

sub.h-e-shādābi-e-jāñ kā kyuuñ hai malāl

ishrat-e-shām-e-ġham kis ke hone se hai

vahshat-e-dil ko kis ne sambhālā diyā

ye junūñ kam se kam kis ke hone se hai

kis se mansūb hai har jafā har vafā

ye sitam ye karam kis ke hone se hai

raunaq-e-besh-o-kam kis ke hone se hai

mausam-e-KHushk-o-nam kis ke hone se hai

kis ka chehra banati hain ye saaten

waqt ka zer-o-bam kis ke hone se hai

kaun guzra ki bante gae raste

rah ka pech-o-KHam kis ke hone se hai

kis ki KHatir darichon se aai hawa

ye faza yun baham kis ke hone se hai

shaKH-dar-shaKH patton ki ye zindagi

aaj bhi mohtaram kis ke hone se hai

maut bar-haq hai kis ke na hone se aaj

zindagi dam-ba-dam kis ke hone se hai

kis ki zulfon ka eajaz hai bu-e-gul

ye hawaon mein nam kis ke hone se hai

subh-e-shadabi-e-jaan ka kyun hai malal

ishrat-e-sham-e-gham kis ke hone se hai

wahshat-e-dil ko kis ne sambhaala diya

ye junun kam se kam kis ke hone se hai

kis se mansub hai har jafa har wafa

ye sitam ye karam kis ke hone se hai