wo jo etibar-e-jamal the wo kahan gae

vo jo e'tibār-e-jamāl the vo kahāñ ga.e

vo jo aap apnī misāl the vo kahāñ ga.e

kabhī har taraf koī dilkashī sī muhīt thī

usī dasht meñ jo ġhazāl the vo kahāñ ga.e

kahīñ ek pal ko bhī tū nazar nahīñ aa rahā

ġham-e-dil tire mah-o-sāl the vo kahāñ ga.e

vo jo ḳhvāb le ke chale the ham vo kahāñ gayā

vo jo us ke ġham meñ niDhāl the vo kahāñ ga.e

kabhī pahroñ us kā bas ik usī kā ḳhayāl thā

vo jo hijr the jo visāl the vo kahāñ ga.e

kabhī pahle jab vo milā thā vaisā nahīñ rahā

ka.ī rañg us meñ kamāl the vo kahāñ ga.e

ye jo log mere qarīb haiñ ye kahāñ ke haiñ

vo jo husn-e-ḳhvāb-o-ḳhayāl the vo kahāñ ga.e

wo jo e'tibar-e-jamal the wo kahan gae

wo jo aap apni misal the wo kahan gae

kabhi har taraf koi dilkashi si muhit thi

usi dasht mein jo ghazal the wo kahan gae

kahin ek pal ko bhi tu nazar nahin aa raha

gham-e-dil tere mah-o-sal the wo kahan gae

wo jo KHwab le ke chale the hum wo kahan gaya

wo jo us ke gham mein niDhaal the wo kahan gae

kabhi pahron us ka bas ek usi ka KHayal tha

wo jo hijr the jo visal the wo kahan gae

kabhi pahle jab wo mila tha waisa nahin raha

kai rang us mein kamal the wo kahan gae

ye jo log mere qarib hain ye kahan ke hain

wo jo husn-e-KHwab-o-KHayal the wo kahan gae