shab-e-siyah pe wa raushni ka bab to ho

shab-e-siyāh pe vā raushnī kā baab to ho

magar ye shart hai koī sitāra-yāb to ho

maiñ harf ban ke tirī ruuh meñ utar jā.ūñ

mirā suḳhan tirī mahfil meñ bāryāb to ho

savād-e-shab ke safar meñ sitāra-vār chalūñ

tire jamāl kī lau merī ham-rikāb to ho

kisī tarah to ghaTe dil kī be-qarārī bhī

chalo vo chashm nahīñ kam se kam sharāb to ho

asās-e-jism uThā.ūñ na.e sire se magar

ye sochtā huuñ ki miTTī mirī ḳharāb to ho

vo 'āftāb' lab-e-bām bhī utar aa.e

magar kisī meñ use dekhne kī taab to ho

shab-e-siyah pe wa raushni ka bab to ho

magar ye shart hai koi sitara-yab to ho

main harf ban ke teri ruh mein utar jaun

mera suKHan teri mahfil mein baryab to ho

sawad-e-shab ke safar mein sitara-war chalun

tere jamal ki lau meri ham-rikab to ho

kisi tarah to ghaTe dil ki be-qarari bhi

chalo wo chashm nahin kam se kam sharab to ho

asas-e-jism uThaun nae sire se magar

ye sochta hun ki miTTi meri KHarab to ho

wo 'aftab' lab-e-baam bhi utar aae

magar kisi mein use dekhne ki tab to ho