shab-e-wasl thi chandni ka saman tha

shab-e-vasl thī chāñdnī kā samāñ thā

baġhal meñ sanam thā ḳhudā mehrbāñ thā

mubārak shab-e-qadr se bhī vo shab thī

sahar tak mah o mushtarī kā qirāñ thā

vo shab thī ki thī raushnī jis meñ din kī

zamīñ par se ik nuur tā āsmāñ thā

nikāle the do chāñd us ne muqābil

vo shab sub.h-e-jannat kā jis par gumāñ thā

urūsī kī shab kī halāvat thī hāsil

farah-nāk thī ruuh dil shādmāñ thā

mushāhid jamāl-e-parī kī thī āñkheñ

makān-e-visāl ik tilismī makāñ thā

huzūrī nigāhoñ ko dīdār se thī

khulā thā vo parda ki jo darmiyāñ thā

kiyā thā use bosa-bāzī ne paidā

kamar kī tarah se jo ġhā.eb dahāñ thā

haqīqat dikhātā thā ishq-e-majāzī

nihāñ jis ko samjhe hue the ayaañ thā

bayāñ ḳhvāb kī tarah jo kar rahā hai

ye qissa hai jab kā ki 'ātish' javāñ thā

shab-e-wasl thi chandni ka saman tha

baghal mein sanam tha KHuda mehrban tha

mubarak shab-e-qadr se bhi wo shab thi

sahar tak mah o mushtari ka qiran tha

wo shab thi ki thi raushni jis mein din ki

zamin par se ek nur ta aasman tha

nikale the do chand us ne muqabil

wo shab subh-e-jannat ka jis par guman tha

urusi ki shab ki halawat thi hasil

farah-nak thi ruh dil shadman tha

mushahid jamal-e-pari ki thi aankhen

makan-e-visal ek tilismi makan tha

huzuri nigahon ko didar se thi

khula tha wo parda ki jo darmiyan tha

kiya tha use bosa-bazi ne paida

kamar ki tarah se jo ghaeb dahan tha

haqiqat dikhata tha ishq-e-majazi

nihan jis ko samjhe hue the ayan tha

bayan KHwab ki tarah jo kar raha hai

ye qissa hai jab ka ki 'atish' jawan tha