shab ko meri chashm-e-hasrat ka sab dard-e-dil un se kah jaana

shab ko mirī chashm-e-hasrat kā sab dard-e-dil un se kah jaanā

dāñtoñ meñ dabā kar hoñT apnā kuchh soch ke us kā rah jaanā

mai-ḳhāne meñ aanā zāhid kā phir dar pe ThiThuk kar rah jaanā

saaqī ke ishāroñ kā mastoñ kuchh kaan meñ sab ke kah jaanā

ai yaas na mānūñgā terī bas dil ko ziyāda ab na dukhā

samjhā chukī us kī pahelī nigah dukh-dard jo ho vo sah jaanā

maanā ki faqat mauhūm sahī milne kī hameñ ik aas to hai

dīdār to ho le dīda-e-tar bahnā ho agar tab bah jaanā

naale hoñ ki aaheñ ai shab-e-ġham jab aa ga.iiñ lab par sabr kiyā

sahne ko to sab kuchh dil ne sahā sahne kī tarah kab sah jaanā

buniyād jamāne meñ jin kī kyā kuchh na bahā thā ḳhūn-e-jigar

ai vā-asfā un mahloñ kā ik chashm-e-zadan meñ Dah jaanā

shab ko vo hathelī se un kā sharmā ke chhupānā āñkhoñ ko

barchhī kā adā kī chal jaanā us tīr-e-nazar kā rah jaanā

utre na kisī ke jab dil meñ us baat kā hāsil kyā vaa.iz

kahne ko kahī yuuñ apnī sī afsos na tū ne kah jaanā

ham baaġh meñ nāhaq aa.e the bulbul kī hikāyat kyā kahiye

minqār ko rakh kar kaliyoñ par kuchh apnī zabāñ meñ kah jaanā

sun leñ dil-e-nādāñ kī bāteñ be-kār bigāḌeñ kaam apnā

vo zulm kareñ ham par ki sitam ai 'shād' hameñ to sah jaanā

shab ko meri chashm-e-hasrat ka sab dard-e-dil un se kah jaana

danton mein daba kar honT apna kuchh soch ke us ka rah jaana

mai-KHane mein aana zahid ka phir dar pe ThiThuk kar rah jaana

saqi ke ishaaron ka maston kuchh kan mein sab ke kah jaana

ai yas na manunga teri bas dil ko ziyaada ab na dukha

samjha chuki us ki paheli nigah dukh-dard jo ho wo sah jaana

mana ki faqat mauhum sahi milne ki hamein ek aas to hai

didar to ho le dida-e-tar bahna ho agar tab bah jaana

nale hon ki aahen ai shab-e-gham jab aa gain lab par sabr kiya

sahne ko to sab kuchh dil ne saha sahne ki tarah kab sah jaana

buniyaad jamane mein jin ki kya kuchh na baha tha KHun-e-jigar

ai wa-asfa un mahlon ka ek chashm-e-zadan mein Dah jaana

shab ko wo hatheli se un ka sharma ke chhupana aankhon ko

barchhi ka ada ki chal jaana us tir-e-nazar ka rah jaana

utre na kisi ke jab dil mein us baat ka hasil kya waiz

kahne ko kahi yun apni si afsos na tu ne kah jaana

hum bagh mein nahaq aae the bulbul ki hikayat kya kahiye

minqar ko rakh kar kaliyon par kuchh apni zaban mein kah jaana

sun len dil-e-nadan ki baaten be-kar bigaDen kaam apna

wo zulm karen hum par ki sitam ai 'shad' hamein to sah jaana