shahab-chehra koi gum-shuda sitara koi

shahāb-chehra koī gum-shuda sitāra koī

huā tulūa ufuq par mire dobāra koī

umīd-vāroñ pe khultā nahīñ vo bāb-e-visāl

aur us ke shahr se kartā nahīñ kināra koī

magar giraft meñ aatā nahīñ badan us kā

ḳhayāl DhūñDhtā rahtā hai isti.āra koī

kahāñ se aate haiñ ye ghar ujālte hue lafz

chhupā hai kyā mirī miTTī meñ māh-pāra koī

bas apne dil kī sadā par nikal chaleñ is baar

ki sab ko ġhaib se miltā nahīñ ishāra koī

gumāñ na kar ki huā ḳhatm kār-e-dil-zadagāñ

ajab nahīñ ki ho is raakh meñ sharāra koī

agar nasīb na ho us qamar kī ham-safrī

to kyuuñ na ḳhāk-e-guzar par kare guzāra koī

shahab-chehra koi gum-shuda sitara koi

hua tulua ufuq par mere dobara koi

umid-waron pe khulta nahin wo bab-e-visal

aur us ke shahr se karta nahin kinara koi

magar giraft mein aata nahin badan us ka

KHayal DhunDhta rahta hai istiara koi

kahan se aate hain ye ghar ujalte hue lafz

chhupa hai kya meri miTTi mein mah-para koi

bas apne dil ki sada par nikal chalen is bar

ki sab ko ghaib se milta nahin ishaara koi

guman na kar ki hua KHatm kar-e-dil-zadagan

ajab nahin ki ho is rakh mein sharara koi

agar nasib na ho us qamar ki ham-safri

to kyun na KHak-e-guzar par kare guzara koi