sham-e-haq shoabada-e-harf dikha kar le jae

sham-e-haq sho.abada-e-harf dikhā kar le jaa.e

kahīñ tujh ko hī na tujh se koī aa kar le jaa.e

pahne phirte haiñ jo pairāhan-e-suqrāt-o-masīh

un kā bahrūp na dil terā lubhā kar le jaa.e

tū chaḌhāvā to nahīñ hai ki koī sehar-maqāl

sū-e-maqtal tujhe lafzoñ meñ sajā kar le jaa.e

tū koī sūkhā huā patta nahīñ hai ki jise

jis taraf mauj-e-havā chāhe uḌā kar le jaa.e

terī aqdār par-e-kāh nahīñ haiñ ki jūñhī

koī lahar uTThe unheñ saath bahā kar le jaa.e

log to taak meñ haiñ aisā na ho koī tujhe

ḳhud tire ḳhauf kī zanjīr pinhā kar le jaa.e

jā-ba-jā shola-bayāñ charb-zabāñ taak meñ haiñ

koī tujh ko bhī na bātoñ meñ lagā kar le jaa.e

lafz tīroñ kī tarah va.az sināñ ke mānind

dil-e-vahshī ko kahāñ koī bachā kar le jaa.e

sham-e-haq shoabada-e-harf dikha kar le jae

kahin tujh ko hi na tujh se koi aa kar le jae

pahne phirte hain jo pairahan-e-suqraat-o-masih

un ka bahrup na dil tera lubha kar le jae

tu chaDhawa to nahin hai ki koi sehar-maqal

su-e-maqtal tujhe lafzon mein saja kar le jae

tu koi sukha hua patta nahin hai ki jise

jis taraf mauj-e-hawa chahe uDa kar le jae

teri aqdar par-e-kah nahin hain ki junhi

koi lahar uTThe unhen sath baha kar le jae

log to tak mein hain aisa na ho koi tujhe

KHud tere KHauf ki zanjir pinha kar le jae

ja-ba-ja shola-bayan charb-zaban tak mein hain

koi tujh ko bhi na baaton mein laga kar le jae

lafz tiron ki tarah waz sinan ke manind

dil-e-wahshi ko kahan koi bacha kar le jae