jab koi leta hai mere samne nam-e-ghazal

jab koī letā hai mere sāmne nām-e-ġhazal

yaad aatā hai mujhe ik nāzuk-andām-e-ġhazal

us harīm-e-nāz us ḳhalvat-sarā-e-rāz meñ

bārhā jazbāt ne bāñdhā hai ehrām-e-ġhazal

ek rashk-e-māh kā maiñ kar rahā huuñ tazkira

āsmāñ se kyuuñ na ho ūñchā mirā bām-e-ġhazal

mai-kada bhī guuñj uTThā shor-e-noshā-nosh se

kis qadar hai kaif-āvar ye mirā jām-e-ġhazal

nau-ba-nau tāza-ba-tāza jalva-e-shādāb-e-husn

kar sake kis tarah āḳhir koī itmām-e-ġhazal

aks-e-zan ho jis ke dil meñ partav-e-rañgīn-e-yār

kaun kah saktā hai 'najmī' us ko nākām-e-ġhazal

dekhte haiñ gosha-e-chashm-e-hayā se vo mujhe

mil rahā hai aaj 'najmī' mujh ko in.ām-e-ġhazal

jab koi leta hai mere samne nam-e-ghazal

yaad aata hai mujhe ek nazuk-andam-e-ghazal

us harim-e-naz us KHalwat-sara-e-raaz mein

barha jazbaat ne bandha hai ehram-e-ghazal

ek rashk-e-mah ka main kar raha hun tazkira

aasman se kyun na ho uncha mera baam-e-ghazal

mai-kada bhi gunj uTTha shor-e-nosha-nosh se

kis qadar hai kaif-awar ye mera jam-e-ghazal

nau-ba-nau taza-ba-taza jalwa-e-shadab-e-husn

kar sake kis tarah aaKHir koi itmam-e-ghazal

aks-e-zan ho jis ke dil mein partaw-e-rangin-e-yar

kaun kah sakta hai 'najmi' us ko nakaam-e-ghazal

dekhte hain gosha-e-chashm-e-haya se wo mujhe

mil raha hai aaj 'najmi' mujh ko inam-e-ghazal