shoala kabhi shabnam kabhi patthar meri aankhen

sho.ala kabhī shabnam kabhī patthar mirī āñkheñ

phir bhī tire jalvoñ kā muqaddar mirī āñkheñ

jab TuuT ke patta koī girtā hai shajar se

rotī haiñ tire ġham se lipaT kar mirī āñkheñ

shabnam se dhule phuul kā paikar tirā chehra

tapte hue sahrāoñ kā manzar mirī āñkheñ

yā mere ḳhalāoñ meñ sajā de koī manzar

yā aur kahīñ rakh de sajā kar mirī āñkheñ

vo chehra mujhe saaf dikhā.ī nahīñ detā

rah jaatī haiñ sāyoñ meñ ulajh kar mirī āñkheñ

phir ashkoñ kā sailāb bahut tez hai 'ḳhālid'

kyā jaane kahāñ jā.eñgī bah kar mirī āñkheñ

shoala kabhi shabnam kabhi patthar meri aankhen

phir bhi tere jalwon ka muqaddar meri aankhen

jab TuT ke patta koi girta hai shajar se

roti hain tere gham se lipaT kar meri aankhen

shabnam se dhule phul ka paikar tera chehra

tapte hue sahraon ka manzar meri aankhen

ya mere KHalaon mein saja de koi manzar

ya aur kahin rakh de saja kar meri aankhen

wo chehra mujhe saf dikhai nahin deta

rah jati hain sayon mein ulajh kar meri aankhen

phir ashkon ka sailab bahut tez hai 'KHalid'

kya jaane kahan jaengi bah kar meri aankhen