shukr kiya hai in peDon ne sabr ki aadat Dali hai

shukr kiyā hai in peḌoñ ne sabr kī aadat Daalī hai

is manzar ko ġhaur se dekho bārish hone vaalī hai

sochā ye thā vaqt milā to TuuTī chīzeñ joḌeñge

ab kone meñ Dher lagā hai baaqī kamrā ḳhālī hai

baiThe baiThe pheñk diyā hai ātish-dān meñ kyā kyā kuchh

mausam itnā sard nahīñ thā jitnī aag jalā lī hai

apnī marzī se sab chīzeñ ghūmtī phirtī rahtī haiñ

be-tartībī ne is ghar meñ itnī jagah banā lī hai

der se qufl paḌā darvāza ik dīvār hī lagtā thā

us par ek khule darvāze kī tasvīr lagā lī hai

har hasrat par ek girah sī paḌ jaatī thī siine meñ

rafta rafta sab ne mil kar dil sī shakl banā lī hai

uupar sab kuchh jal jā.egā kaun madad ko aa.egā

jis manzil par aag lagī hai sab se nīche vaalī hai

ik kamrā sāyoñ se bharā hai ik kamrā āvāzoñ se

āñgan meñ kuchh ḳhvāb paḌe haiñ vaise ye ghar ḳhālī hai

pairoñ ko to dasht bhī kam hai sar ko dasht-navardī bhī

'ādil' ham se chādar jitnī phail sakī phailā lī hai

shukr kiya hai in peDon ne sabr ki aadat Dali hai

is manzar ko ghaur se dekho barish hone wali hai

socha ye tha waqt mila to TuTi chizen joDenge

ab kone mein Dher laga hai baqi kamra KHali hai

baiThe baiThe phenk diya hai aatish-dan mein kya kya kuchh

mausam itna sard nahin tha jitni aag jala li hai

apni marzi se sab chizen ghumti phirti rahti hain

be-tartibi ne is ghar mein itni jagah bana li hai

der se qufl paDa darwaza ek diwar hi lagta tha

us par ek khule darwaze ki taswir laga li hai

har hasrat par ek girah si paD jati thi sine mein

rafta rafta sab ne mil kar dil si shakl bana li hai

upar sab kuchh jal jaega kaun madad ko aaega

jis manzil par aag lagi hai sab se niche wali hai

ek kamra sayon se bhara hai ek kamra aawazon se

aangan mein kuchh KHwab paDe hain waise ye ghar KHali hai

pairon ko to dasht bhi kam hai sar ko dasht-nawardi bhi

'adil' hum se chadar jitni phail saki phaila li hai