ستم گرمیٔ صحرا مجھے معلوم نہ تھا

ستم گرمیٔ صحرا مجھے معلوم نہ تھا

خشک ہو جائے گا دریا مجھے معلوم نہ تھا

میں نے سمجھا تھا کہ فردوس بریں ہے دنیا

اک جہنم ہے سراپا مجھے معلوم نہ تھا

چند دانستہ حقائق کی طلب کی خاطر

ظلم ڈھائے گا زمانہ مجھے معلوم نہ تھا

لہلہا اٹھتا چمن میری امیدوں کا مگر

زرد تھا وقت کا چہرا مجھے معلوم نہ تھا

دوستی پیار خلوص امن وفا کی خوشبو

یہ ہیں الفاظ تمنا مجھے معلوم نہ تھا

بارہا جس کے قریب آ کے ملا مجھ کو سکوں

میرا اپنا ہی تھا سایہ مجھے معلوم نہ تھا

عہد طفلی تھا کمالؔ عہد مسرت آگیں

غم کے سائے میں پلوں گا مجھے معلوم نہ تھا