siyah-KHana-e-ummid-e-raegan se nikal

siyāh-ḳhāna-e-ummīd-e-rā.egāñ se nikal

khulī fazā meñ zarā aa ġhubār-e-jāñ se nikal

ajiib bhiiḌ yahāñ jam.a hai yahāñ se nikal

kahīñ bhī chal magar is shahr-e-be-amāñ se nikal

ik aur raah udhar dekh jā rahī hai vahīñ

ye log aate raheñge tū darmiyāñ se nikal

zarā baḌhā to sahī vāqi.āt ko aage

tilism-kārī-e-āġhāz-e-dāstāñ se nikal

tū koī ġham hai to dil meñ jagah banā apnī

tū ik sadā hai to ehsās kī kamāñ se nikal

yahīñ kahīñ tirā dushman chhupā hai ai 'bānī'

koī bahāna banā bazm-e-dostāñ se nikal

siyah-KHana-e-ummid-e-raegan se nikal

khuli faza mein zara aa ghubar-e-jaan se nikal

ajib bhiD yahan jama hai yahan se nikal

kahin bhi chal magar is shahr-e-be-aman se nikal

ek aur rah udhar dekh ja rahi hai wahin

ye log aate rahenge tu darmiyan se nikal

zara baDha to sahi waqiat ko aage

tilism-kari-e-aghaz-e-dastan se nikal

tu koi gham hai to dil mein jagah bana apni

tu ek sada hai to ehsas ki kaman se nikal

yahin kahin tera dushman chhupa hai ai 'bani'

koi bahana bana bazm-e-dostan se nikal