suKHan raaz-e-nashat-o-gham ka parda ho hi jata hai

suḳhan rāz-e-nashāt-o-ġham kā parda ho hī jaatā hai

ġhazal kah leñ to jī kā bojh halkā ho hī jaatā hai

vo aalam jab kisī māyūs kā hotā nahīñ koī

tujhe ma.alūm bhī hai tū kisī kā ho hī jaatā hai

kiyā hai maiñ ne iz.hār-e-tamannā jaane kis kis se

mujhe aksar tirī sūrat kā dhokā ho hī jaatā hai

hujūm-e-ārzū hamrāh-e-jān-o-dil sahī lekin

qarīb-e-kū-e-jānāñ koī tanhā ho hī jaatā hai

hameñ to umr-bhar kā ġham ki aisā kyuuñ huā hogā

hameñ ab kaun samjhā.e ki aisā ho hī jaatā hai

koī tujh sā nahīñ hai anjuman-dar-anjuman dekhā

magar tanhā.iyoñ meñ koī tujh sā ho hī jaatā hai

na ro yuuñ 'shāz' āñkheñ jo dikhā.eñ dekhte jaao

na itnā ġham karo ye dil hai sahrā ho hī jaatā hai

suKHan raaz-e-nashat-o-gham ka parda ho hi jata hai

ghazal kah len to ji ka bojh halka ho hi jata hai

wo aalam jab kisi mayus ka hota nahin koi

tujhe malum bhi hai tu kisi ka ho hi jata hai

kiya hai main ne izhaar-e-tamanna jaane kis kis se

mujhe aksar teri surat ka dhoka ho hi jata hai

hujum-e-arzu hamrah-e-jaan-o-dil sahi lekin

qarib-e-ku-e-jaanan koi tanha ho hi jata hai

hamein to umr-bhar ka gham ki aisa kyun hua hoga

hamein ab kaun samjhae ki aisa ho hi jata hai

koi tujh sa nahin hai anjuman-dar-anjuman dekha

magar tanhaiyon mein koi tujh sa ho hi jata hai

na ro yun 'shaz' aankhen jo dikhaen dekhte jao

na itna gham karo ye dil hai sahra ho hi jata hai