sukut-e-arz-o-sama mein KHub intishaar dekhun

sukūt-e-arz-o-samā meñ ḳhuub intishār dekhūñ

ḳhalā meñ apnī sadā kā phailā ġhubār dekhūñ

ajab nahīñ hai ki aa hī jaa.e vo ḳhush-samā.at

dayār-e-dil se maiñ kyuuñ na us ko pukār dekhūñ

khaḌī hai dīvār āñsuoñ kī mire barābar

to kis tarah maiñ tirī tamannā ke paar dekhūñ

bikhartā jaatā huuñ jaise tasbīh ke hoñ daane

jab us ke aañsū qatār-andar-qatār dekhūñ

vo merā isbāt chāhtā hai so jabr ye hai

maiñ apne hone meñ us ko be-iḳhtiyār dekhūñ

jo ek dam meñ tamām rūhoñ ko ḳhaak kar de

badan se uḌtā huā ik aisā sharār dekhūñ

bahut dinoñ se vahāñ maiñ apnā hī muntazir huuñ

to ḳhud ko ik din tirī galī se guzār dekhūñ

sukut-e-arz-o-sama mein KHub intishaar dekhun

KHala mein apni sada ka phaila ghubar dekhun

ajab nahin hai ki aa hi jae wo KHush-samaat

dayar-e-dil se main kyun na us ko pukar dekhun

khaDi hai diwar aansuon ki mere barabar

to kis tarah main teri tamanna ke par dekhun

bikharta jata hun jaise tasbih ke hon dane

jab us ke aansu qatar-andar-qatar dekhun

wo mera isbaat chahta hai so jabr ye hai

main apne hone mein us ko be-iKHtiyar dekhun

jo ek dam mein tamam ruhon ko KHak kar de

badan se uDta hua ek aisa sharar dekhun

bahut dinon se wahan main apna hi muntazir hun

to KHud ko ek din teri gali se guzar dekhun