sulagna andar andar misra-e-tar sochte rahna

sulagnā andar andar misra-e-tar sochte rahnā

badan par Daal kar zaḳhmoñ kī chādar sochte rahnā

nahīñ kam jāñ-gusil ye marhala bhī ḳhud-shanāsī kā

ki apne hī ma.ānī lafz ban kar sochte rahnā

zabāñ se kuchh na kahnā bāvajūd-e-tāb-e-goyā.ī

khulī āñkhoñ se bas manzar ba manzar sochte rahnā

kisī lamhe to ḳhud se lā-ta.alluq bhī raho logo

masā.il kam nahīñ phir zindagī bhar sochte rahnā

charāġh-e-zindagī hai yā bisāt-e-ātish-e-rafta

jalā kar raushnī dahlīz-e-jāñ par sochte rahnā

ajab shai hai 'fazā' zehn o nazar kī ye asīrī bhī

musalsal dekhte rahnā barābar sochte rahnā

sulagna andar andar misra-e-tar sochte rahna

badan par Dal kar zaKHmon ki chadar sochte rahna

nahin kam jaan-gusil ye marhala bhi KHud-shanasi ka

ki apne hi maani lafz ban kar sochte rahna

zaban se kuchh na kahna bawajud-e-tab-e-goyai

khuli aankhon se bas manzar ba manzar sochte rahna

kisi lamhe to KHud se la-talluq bhi raho logo

masail kam nahin phir zindagi bhar sochte rahna

charagh-e-zindagi hai ya bisat-e-atish-e-rafta

jala kar raushni dahliz-e-jaan par sochte rahna

ajab shai hai 'faza' zehn o nazar ki ye asiri bhi

musalsal dekhte rahna barabar sochte rahna