sunata hai koi bholi kahani

sunātā hai koī bholī kahānī

mahakte mīThe dariyāoñ kā paanī

yahāñ jangal the ābādī se pahle

sunā hai maiñ ne logoñ kī zabānī

yahāñ ik shahr thā shahr-e-nigārāñ

na chhoḌī vaqt ne is kī nishānī

maiñ vo dil huuñ dabistān-e-alam kā

jise ro.egī barsoñ shādmānī

tahayyur ne use dekhā hai aksar

ḳhirad kahtī hai jis ko lā-makānī

ḳhayāloñ hī meñ aksar baiThe baiThe

basā letā huuñ ik duniyā suhānī

hujūm-e-nashsha-e-fikr-e-suḳhan meñ

badal jaate haiñ lafzoñ ke ma.ānī

batā ai zulmat-e-sahrā-e-imkāñ

kahāñ hogā mire ḳhvāboñ kā saanī

añdherī shaam ke pardoñ meñ chhup kar

kise rotī hai chashmoñ kī ravānī

kiran pariyāñ utartī haiñ kahāñ se

kahāñ jaate haiñ riste kahkashānī

pahāḌoñ se chalī phir koī āñdhī

uḌe jaate haiñ aurāq-e-ḳhizānī

na.ī duniyā ke hañgāmoñ meñ 'nāsir'

dabī jaatī haiñ āvāzeñ purānī

sunata hai koi bholi kahani

mahakte miThe dariyaon ka pani

yahan jangal the aabaadi se pahle

suna hai main ne logon ki zabani

yahan ek shahr tha shahr-e-nigaran

na chhoDi waqt ne is ki nishani

main wo dil hun dabistan-e-alam ka

jise roegi barson shadmani

tahayyur ne use dekha hai aksar

KHirad kahti hai jis ko la-makani

KHayalon hi mein aksar baiThe baiThe

basa leta hun ek duniya suhani

hujum-e-nashsha-e-fikr-e-suKHan mein

badal jate hain lafzon ke maani

bata ai zulmat-e-sahra-e-imkan

kahan hoga mere KHwabon ka sani

andheri sham ke pardon mein chhup kar

kise roti hai chashmon ki rawani

kiran pariyan utarti hain kahan se

kahan jate hain riste kahkashani

pahaDon se chali phir koi aandhi

uDe jate hain auraq-e-KHizani

nai duniya ke hangamon mein 'nasir'

dabi jati hain aawazen purani