suno ab hum mohabbat mein bahut aage nikal aae

suno ab ham mohabbat meñ bahut aage nikal aa.e

ki ik raste pe chalte chalte sau raste nikal aa.e

agarche kam na thii, chārā-garān-e-shahr kī pursish

magar! kuchh zaḳhm-e-nā-dīda bahut gahre nikal aa.e

mohabbat kī to koī had, koī sarhad nahīñ hotī

hamāre darmiyāñ ye fāsle, kaise nikal aa.e

bahut din tak hisār-e-nashsha yaktā.ī meñ rakkhā

phir is chehre ke andar bhī ka.ī chehre nikal aa.e

purāne zaḳhm bharte hii, na.e zaḳhmoñ ke shaidā.ī

mizāj-e-ā.ina oḌhe hue ghar se nikal aa.e

tazād-e-zāt ke baa.is khulā vo kam-suḳhan aisā

adhūrī baat ke mafhūm bhī puure nikal aa.e

suno ab hum mohabbat mein bahut aage nikal aae

ki ek raste pe chalte chalte sau raste nikal aae

agarche kam na thi, chaara-garan-e-shahr ki pursish

magar! kuchh zaKHm-e-na-dida bahut gahre nikal aae

mohabbat ki to koi had, koi sarhad nahin hoti

hamare darmiyan ye fasle, kaise nikal aae

bahut din tak hisar-e-nashsha yaktai mein rakkha

phir is chehre ke andar bhi kai chehre nikal aae

purane zaKHm bharte hi, nae zaKHmon ke shaidai

mizaj-e-aina oDhe hue ghar se nikal aae

tazad-e-zat ke bais khula wo kam-suKHan aisa

adhuri baat ke mafhum bhi pure nikal aae