surKH sahar se hai to bas itna sa gila hum logon ka

surḳh sahar se hai to bas itnā sā gila ham logoñ kā

hijr charāġhoñ meñ phir shab bhar ḳhuun jalā ham logoñ kā

ham vahshī the vahshat meñ bhī ghar se kabhī bāhar na rahe

jañgal jañgal phir bhī kitnā naam huā ham logoñ kā

aur to kuchh nuqsān huā ho ḳhvāb meñ yaad nahīñ hai magar

ek sitāra zarb-e-sahar se TuuT gayā ham logoñ kā

ye jo ham taḳhlīq-e-jahān-e-nau meñ lage haiñ pāgal haiñ

duur se ham ko dekhne vaale haath baTā ham logoñ kā

bigḌe the bigḌe hī rahe aur umr guzārī mastī meñ

duniyā duniyā karne se jab kuchh na banā ham logoñ kā

ḳhaak kī shohrat dekh ke ham bhī ḳhaak hue the pal bhar ko

phir to ta.āqub kartī rahī ik umr havā ham logoñ kā

shab bhar ik āvāz banā.ī sub.h huī to chīḳh paḌe

roz kā ik ma.amūl hai ab to ḳhvāb-zada ham logoñ kā

surKH sahar se hai to bas itna sa gila hum logon ka

hijr charaghon mein phir shab bhar KHun jala hum logon ka

hum wahshi the wahshat mein bhi ghar se kabhi bahar na rahe

jangal jangal phir bhi kitna nam hua hum logon ka

aur to kuchh nuqsan hua ho KHwab mein yaad nahin hai magar

ek sitara zarb-e-sahar se TuT gaya hum logon ka

ye jo hum taKHliq-e-jahan-e-nau mein lage hain pagal hain

dur se hum ko dekhne wale hath baTa hum logon ka

bigDe the bigDe hi rahe aur umr guzari masti mein

duniya duniya karne se jab kuchh na bana hum logon ka

KHak ki shohrat dekh ke hum bhi KHak hue the pal bhar ko

phir to taaqub karti rahi ek umr hawa hum logon ka

shab bhar ek aawaz banai subh hui to chiKH paDe

roz ka ek mamul hai ab to KHwab-zada hum logon ka