suraj hun chamakne ka bhi haq chahiye mujhko

sūraj huuñ chamakne kā bhī haq chāhiye mujh ko

maiñ kohr meñ lipTā huuñ shafaq chāhiye mujh ko

ho jaa.e koī chiiz to mujh se bhī ibārat

likhne ke liye saada varaq chāhiye mujh ko

ḳhanjar hai tū lahrā ke mire dil meñ utar jā

hai aañkh kī ḳhvāhish ki shafaq chāhiye mujh ko

ho vahm kī dastak ki kisī paañv kī aahaT

jiine ke liye kuchh to ramaq chāhiye mujh ko

har baar mirī raah meñ haa.il ho nayā sañg

har baar koī taaza sabaq chāhiye mujh ko

jo kuchh bhī ho baaqī vo mire haath pe likh de

mazmūn bahar-taur adaq chāhiye mujh ko

jo zehn meñ tasvīr hai kāġhaz par utar aa.e

duniyā meñ numā.ish kā bhī haq chāhiye mujh ko

har phuul ke siine meñ gul-e-sañg ho 'sājid'

har sañg meñ ik rañg-e-qalaq chāhiye mujh ko

suraj hun chamakne ka bhi haq chahiye mujh ko

main kohr mein lipTa hun shafaq chahiye mujh ko

ho jae koi chiz to mujh se bhi ibarat

likhne ke liye sada waraq chahiye mujh ko

KHanjar hai tu lahra ke mere dil mein utar ja

hai aankh ki KHwahish ki shafaq chahiye mujh ko

ho wahm ki dastak ki kisi panw ki aahaT

jine ke liye kuchh to ramaq chahiye mujh ko

har bar meri rah mein hail ho naya sang

har bar koi taza sabaq chahiye mujh ko

jo kuchh bhi ho baqi wo mere hath pe likh de

mazmun bahar-taur adaq chahiye mujh ko

jo zehn mein taswir hai kaghaz par utar aae

duniya mein numaish ka bhi haq chahiye mujh ko

har phul ke sine mein gul-e-sang ho 'sajid'

har sang mein ek rang-e-qalaq chahiye mujh ko