taghayyuraat ke aalam mein zindagani hai

taġhayyurāt ke aalam meñ zindagānī hai

shabāb faanī nazar faanī husn faanī hai

tamām ālam-e-hastī pe hukmarānī hai

mirā jahān hai jab tak mirī javānī hai

maiñ shaad huuñ to zamāne meñ shādmānī hai

sharāb laao ki aalam tamām faanī hai

tire ḳhayāl se hai masti-e-nazar merī

tirī nigāh se maiñ ne sharāb chhānī hai

tirā jamāl fasānoñ meñ rañg bhartā hai

tire shabāb se dilkash mirī kahānī hai

mirī hayāt meñ jab tū nahīñ to kuchh bhī nahīñ

tire baġhair bhī kyā ḳhāk-e-zindagānī hai

dil-e-fasurda meñ hotī hai zindagī paidā

'nushūr' jur.a-e-sahbā bhī zindagānī hai

taghayyuraat ke aalam mein zindagani hai

shabab fani nazar fani husn fani hai

tamam aalam-e-hasti pe hukmarani hai

mera jahan hai jab tak meri jawani hai

main shad hun to zamane mein shadmani hai

sharab lao ki aalam tamam fani hai

tere KHayal se hai masti-e-nazar meri

teri nigah se main ne sharab chhani hai

tera jamal fasanon mein rang bharta hai

tere shabab se dilkash meri kahani hai

meri hayat mein jab tu nahin to kuchh bhi nahin

tere baghair bhi kya KHak-e-zindagani hai

dil-e-fasurda mein hoti hai zindagi paida

'nushur' jura-e-sahba bhi zindagani hai