tanha nahin hun gar dil-e-diwana sath hai

tanhā nahīñ huuñ gar dil-e-dīvāna saath hai

vo harzah-gard huuñ ki parī-ḳhāna saath hai

hañgāma ik parī kī savārī kā dekhnā

kyā dhuum hai ki saikḌoñ dīvāna saath hai

dil meñ haiñ laakh tarah ke hiile bhare hue

phir mashvara ko ā.īna o shāna saath hai

roz-e-siyah meñ saath koī de to jāniye

jab tak faroġh-e-sham.a hai parvāna saath hai

detā nahīñ hai saath tahī-dast kā koī

jab tak ki mai hai shīshe meñ paimāna saath hai

sīkhā huuñ mai-kade meñ tarīq-e-farotanī

jab tak ki sar hai sajda-e-shukrāna saath hai

jo be-basar haiñ DhūñDte phirte haiñ duur duur

aur har qadam pe jalva-e-jānāna saath hai

kyā ḳhauf ho hameñ zan-e-duniyā ke makr kā

apnī madad ko himmat-e-mardāna saath hai

ġham kī kitāb se dil-e-sad-pāra kam nahīñ

jis bazm meñ ga.e yahī afsāna saath hai

mānind-e-gard-bād huuñ ḳhāna-ba-dosh maiñ

sahrā meñ huuñ magar mirā kāshāna saath hai

tanha nahin hun gar dil-e-diwana sath hai

wo harzah-gard hun ki pari-KHana sath hai

hangama ek pari ki sawari ka dekhna

kya dhum hai ki saikDon diwana sath hai

dil mein hain lakh tarah ke hile bhare hue

phir mashwara ko aaina o shana sath hai

roz-e-siyah mein sath koi de to jaaniye

jab tak farogh-e-shama hai parwana sath hai

deta nahin hai sath tahi-dast ka koi

jab tak ki mai hai shishe mein paimana sath hai

sikha hun mai-kade mein tariq-e-farotani

jab tak ki sar hai sajda-e-shukrana sath hai

jo be-basar hain DhunDte phirte hain dur dur

aur har qadam pe jalwa-e-jaanana sath hai

kya KHauf ho hamein zan-e-duniya ke makr ka

apni madad ko himmat-e-mardana sath hai

gham ki kitab se dil-e-sad-para kam nahin

jis bazm mein gae yahi afsana sath hai

manind-e-gard-baad hun KHana-ba-dosh main

sahra mein hun magar mera kashana sath hai