tera KHayal teri tamanna tak aa gaya

terā ḳhayāl terī tamannā tak aa gayā

maiñ dil ko DhūñDhtā huā duniyā tak aa gayā

kyā itnā baḌh gayā mirī tishna-labī kā shor

sailāb dekhne mujhe sahrā tak aa gayā

lekin ḳhizāñ kī nazr kiyā āḳhirī gulāb

har-chand is meñ mujh ko pasīna tak aa gayā

aage rah-e-firāq meñ aanā hai aur kyā

āñkhoñ ke aage aaj añdherā tak aa gayā

kyā irtiqā-pazīr hai insān kā zamīr

rishtoñ ko chhoḌ-chhāḌ ke ashyā tak aa gayā

lekin kisī darīche se jhāñkā na koī raat

sun kar mirī pukār sitāra tak aa gayā

'kāshif'-husain yaar uTho ab to chal paḌo

chal kar tumhāre paañv meñ rasta tak aa gayā

tera KHayal teri tamanna tak aa gaya

main dil ko DhunDhta hua duniya tak aa gaya

kya itna baDh gaya meri tishna-labi ka shor

sailab dekhne mujhe sahra tak aa gaya

lekin KHizan ki nazr kiya aaKHiri gulab

har-chand is mein mujh ko pasina tak aa gaya

aage rah-e-firaq mein aana hai aur kya

aankhon ke aage aaj andhera tak aa gaya

kya irtiqa-pazir hai insan ka zamir

rishton ko chhoD-chhaD ke ashya tak aa gaya

lekin kisi dariche se jhanka na koi raat

sun kar meri pukar sitara tak aa gaya

'kashif'-husain yar uTho ab to chal paDo

chal kar tumhaare panw mein rasta tak aa gaya