tere hote hue mahfil mein jalate hain charagh

tere hote hue mahfil meñ jalāte haiñ charāġh

log kyā saada haiñ sūraj ko dikhāte haiñ charāġh

apnī mahrūmī ke ehsās se sharminda haiñ

ḳhud nahīñ rakhte to auroñ ke bujhāte haiñ charāġh

bastiyāñ duur huī jaatī haiñ rafta rafta

dam-ba-dam āñkhoñ se chhupte chale jaate haiñ charāġh

kyā ḳhabar un ko ki dāman bhī bhaḌak uThte haiñ

jo zamāne kī havāoñ se bachāte haiñ charāġh

go siyah-baḳht haiñ ham log pe raushan hai zamīr

ḳhud añdhere meñ haiñ duniyā ko dikhāte haiñ charāġh

bastiyāñ chāñd sitāroñ kī basāne vaalo

kurra-e-arz pe bujhte chale jaate haiñ charāġh

aise bedard hue ham bhī ki ab gulshan par

barq girtī hai to zindāñ meñ jalāte haiñ charāġh

aisī tārīkiyāñ āñkhoñ meñ basī haiñ ki 'farāz'

raat to raat hai ham din ko jalāte haiñ charāġh

tere hote hue mahfil mein jalate hain charagh

log kya sada hain suraj ko dikhate hain charagh

apni mahrumi ke ehsas se sharminda hain

KHud nahin rakhte to auron ke bujhate hain charagh

bastiyan dur hui jati hain rafta rafta

dam-ba-dam aankhon se chhupte chale jate hain charagh

kya KHabar un ko ki daman bhi bhaDak uThte hain

jo zamane ki hawaon se bachate hain charagh

go siyah-baKHt hain hum log pe raushan hai zamir

KHud andhere mein hain duniya ko dikhate hain charagh

bastiyan chand sitaron ki basane walo

kurra-e-arz pe bujhte chale jate hain charagh

aise bedard hue hum bhi ki ab gulshan par

barq girti hai to zindan mein jalate hain charagh

aisi tarikiyan aankhon mein basi hain ki 'faraaz'

raat to raat hai hum din ko jalate hain charagh