teri yaaden hain jinhen dil mein basa rakkha hai

terī yādeñ haiñ jinheñ dil meñ basā rakkhā hai

ham ne is aag ko siine meñ dabā rakkhā hai

shahr ho dasht-e-tamannā ho ki dariyā kā safar

terī tasvīr ko siine se lagā rakkhā hai

ye to mumkin hī nahīñ husn kā faizān na ho

ishq ne husn ko armān banā rakkhā hai

kaisā sūraj hai ki detā nahīñ zulmat ko shikast

kyuuñ añdheroñ ne ujāloñ ko dabā rakkhā hai

tishnagī apnī miTā le ki hañsnegī duniyā

pī to le sāġhar-e-taslīm-o-razā rakkhā hai

haq ke lashkar meñ sipāhī haiñ bahut thoḌe se

ham ne hī hausla bātil kā baḌhā rakkhā hai

kab nikalnā hai use ye bhī batā saktī hai

zulmat-e-shab ne bhī sūraj kā pata rakkhā hai

ḳhūgar-e-zabt haiñ rusvā na kareñge tujh ko

ham ne duniyā se tire ġham ko chhupā rakkhā hai

dil jo TuuTe haiñ unheñ joḌ ke dikhlāo 'shahīd'

varna in kashf-o-karāmāt meñ kyā rakkhā hai

teri yaaden hain jinhen dil mein basa rakkha hai

hum ne is aag ko sine mein daba rakkha hai

shahr ho dasht-e-tamanna ho ki dariya ka safar

teri taswir ko sine se laga rakkha hai

ye to mumkin hi nahin husn ka faizan na ho

ishq ne husn ko arman bana rakkha hai

kaisa suraj hai ki deta nahin zulmat ko shikast

kyun andheron ne ujalon ko daba rakkha hai

tishnagi apni miTa le ki hansnegi duniya

pi to le saghar-e-taslim-o-raza rakkha hai

haq ke lashkar mein sipahi hain bahut thoDe se

hum ne hi hausla baatil ka baDha rakkha hai

kab nikalna hai use ye bhi bata sakti hai

zulmat-e-shab ne bhi suraj ka pata rakkha hai

KHugar-e-zabt hain ruswa na karenge tujh ko

hum ne duniya se tere gham ko chhupa rakkha hai

dil jo TuTe hain unhen joD ke dikhlao 'shahid'

warna in kashf-o-karamat mein kya rakkha hai