thakan to agle safar ke liye bahana tha

thakan to agle safar ke liye bahāna thā

use to yuuñ bhī kisī aur samt jaanā thā

vahī charāġh bujhā jis kī lau qayāmat thī

usī pe zarb paḌī jo shajar purānā thā

matā-e-jāñ kā badal ek pal kī sarshārī

sulūk ḳhvāb kā āñkhoñ se tājirāna thā

havā kī kaaT shagūfoñ ne jazb kar lī thī

tabhī to lahja-e-ḳhushbū bhī jārihāna thā

vahī firāq kī bāteñ vahī hikāyat-e-vasl

na.ī kitāb kā ek ik varaq purānā thā

qabā-e-zard nigār-e-ḳhizāñ pe sajtī thī

tabhī to chaal kā andāz ḳhusravāna thā

thakan to agle safar ke liye bahana tha

use to yun bhi kisi aur samt jaana tha

wahi charagh bujha jis ki lau qayamat thi

usi pe zarb paDi jo shajar purana tha

mata-e-jaan ka badal ek pal ki sarshaari

suluk KHwab ka aankhon se tajirana tha

hawa ki kaT shagufon ne jazb kar li thi

tabhi to lahja-e-KHushbu bhi jarihana tha

wahi firaq ki baaten wahi hikayat-e-wasl

nai kitab ka ek ek waraq purana tha

qaba-e-zard nigar-e-KHizan pe sajti thi

tabhi to chaal ka andaz KHusrawana tha