tere KHayal ka daman suKHan ne tham liya

tire ḳhayāl kā dāman suḳhan ne thaam liyā

firāq meñ bhī mohabbat se ḳhuub kaam liyā

hamārā ishq ibādat kā aglā darja hai

ḳhudā ne chhoḌ diyā to tumhārā naam liyā

ġhamoñ se bair thā so ham ne ḳhud-kushī kar lī

shajar girā ke parindoñ se intiqām liyā

bichhaḌ ke tum se ka.ī bichhḌe log yaad aa.e

diyā bujhā to inhīñ jugnuoñ se kaam liyā

nigāh-e-shauq kī aamad huī thī bastī meñ

har ek chāñd ne phir apnā apnā baam liyā

tere KHayal ka daman suKHan ne tham liya

firaq mein bhi mohabbat se KHub kaam liya

hamara ishq ibaadat ka agla darja hai

KHuda ne chhoD diya to tumhaara nam liya

ghamon se bair tha so hum ne KHud-kushi kar li

shajar gira ke parindon se intiqam liya

bichhaD ke tum se kai bichhDe log yaad aae

diya bujha to inhin jugnuon se kaam liya

nigah-e-shauq ki aamad hui thi basti mein

har ek chand ne phir apna apna baam liya