teri koshish hum ai dil sai-e-la-hasil samajhte hain

tirī koshish ham ai dil sa.i-e-lā-hāsil samajhte haiñ

sar-e-manzil tujhe begāna-e-manzil samajhte haiñ

usūl-e-zindagī jāñ-dāda-e-qātil samajhte haiñ

na sar ko sar samajhte haiñ na dil ko dil samajhte haiñ

ġharīq-e-bahr-e-ulfat āshnā-e-qulzum-e-ma.anī

jahāñ par Duub kar ubhreñ use sāhil samajhte haiñ

dayār-e-ishq ke sākin zamīñ par paañv kyā rakkheñ

yahāñ ke zarre zarre ko jab apnā dil samajhte haiñ

kareñ kyā un se shikva jo kisī ke dil jalāne ko

faroġh-e-garmī-e-hañgāma-e-mahfil samajhte haiñ

jhukānā āstāñ par sar koī mushkil nahīñ lekin

jabīn-e-bandagī ko ham kab is qābil samajhte haiñ

shikasta-dil liye ye soch kar is bazm se niklā

shikāyat kījiye un se jo dil ko dil samajhte haiñ

ye dil hāzir hai bismillāh vo kholeñ girah is kī

agar āsān hall-e-uqda-e-mushkil samajhte haiñ

lab-e-fariyād agar kholūñ to kyā hañgāma barpā ho

ḳhamoshī ko mirī jab guftugū-e-dil samajhte haiñ

vo ḳhalvat ho ki jalvat ho tajallī ho ki tārīkī

jahāñ tum ho usī ko ham bharī mahfil samajhte haiñ

irāda ho to dil mazbūt kar ai Dūbne vaale

jab aisā vaqt ho dhāre ko bhī sāhil samajhte haiñ

dam-e-āḳhir rukā hai ek aañsū dīda-e-tar meñ

isī ko hasti-e-nākām kā hāsil samajhte haiñ

vafā kī had dikhā kar jalne vaale dil ḳhudā-hāfiz

tujhe bhī ik charāġh-e-Kushta-e-manzil samajhte haiñ

miTā Daalā mujhe phir bhī ye hai bedād kī hasrat

abhī fehrist-e-maujūdāt meñ shāmil samajhte haiñ

mirā tarz-e-sulūk is raah ke rah-rau na samjheñge

magar jo rāhbar rāh-e-haq-o-bātil samajhte haiñ

nisār-e-dost hai ye motiyoñ kā be-bahā maalā

har ik aañsū ko ham TuuTā huā ik dil samajhte haiñ

jinheñ ma.alūm hai terī nigāh-e-nāz kā aalam

vo apne zabt ke da.avoñ ko ḳhud bātil samajhte haiñ

'azīz' afkār-e-duniyā aur mashāġhil sher-goī ke

ahibbā kī mohabbat hai jo is qābil samajhte haiñ

teri koshish hum ai dil sai-e-la-hasil samajhte hain

sar-e-manzil tujhe begana-e-manzil samajhte hain

usul-e-zindagi jaan-dada-e-qatil samajhte hain

na sar ko sar samajhte hain na dil ko dil samajhte hain

ghariq-e-bahr-e-ulfat aashna-e-qulzum-e-mani

jahan par Dub kar ubhren use sahil samajhte hain

dayar-e-ishq ke sakin zamin par panw kya rakkhen

yahan ke zarre zarre ko jab apna dil samajhte hain

karen kya un se shikwa jo kisi ke dil jalane ko

farogh-e-garmi-e-hangama-e-mahfil samajhte hain

jhukana aastan par sar koi mushkil nahin lekin

jabin-e-bandagi ko hum kab is qabil samajhte hain

shikasta-dil liye ye soch kar is bazm se nikla

shikayat kijiye un se jo dil ko dil samajhte hain

ye dil hazir hai bismillah wo kholen girah is ki

agar aasan hall-e-uqda-e-mushkil samajhte hain

lab-e-fariyaad agar kholun to kya hangama barpa ho

KHamoshi ko meri jab guftugu-e-dil samajhte hain

wo KHalwat ho ki jalwat ho tajalli ho ki tariki

jahan tum ho usi ko hum bhari mahfil samajhte hain

irada ho to dil mazbut kar ai Dubne wale

jab aisa waqt ho dhaare ko bhi sahil samajhte hain

dam-e-aKHir ruka hai ek aansu dida-e-tar mein

isi ko hasti-e-nakaam ka hasil samajhte hain

wafa ki had dikha kar jalne wale dil KHuda-hafiz

tujhe bhi ek charagh-e-Kushta-e-manzil samajhte hain

miTa Dala mujhe phir bhi ye hai bedad ki hasrat

abhi fehrist-e-maujudat mein shamil samajhte hain

mera tarz-e-suluk is rah ke rah-rau na samjhenge

magar jo rahbar rah-e-haq-o-baatil samajhte hain

nisar-e-dost hai ye motiyon ka be-baha mala

har ek aansu ko hum TuTa hua ek dil samajhte hain

jinhen malum hai teri nigah-e-naz ka aalam

wo apne zabt ke dawon ko KHud baatil samajhte hain

'aziz' afkar-e-duniya aur mashaghil sher-goi ke

ahibba ki mohabbat hai jo is qabil samajhte hain